شوبير محذرًا هاني أبو ريدة: شامم ريحة مش لطيفة.. وإياك والاستعانة بالفاسدين في اتحاد الكرة - مصر بوست

الأحد 17/نوفمبر/2024 - 11:40 ص

وجه الإعلامي أحمد شوبير رسالة إلى هاني أبو ريدة قبل توليه مسؤولية رئاسة اتحاد الكرة بشكل رسمي، بعد غلق باب الترشح للانتخابات دون ترشح سوى قائمته.

رسالة قوية من شوبير إلى هاني أبو ريدة قبل توليه مسؤولية اتحاد الكرة

قال شوبير في تصريحات إذاعية: رسالتي إلى المهندس هاني أبو ريدة إياك وتكرار أخطاء الماضي، وبلاش تجيب حد سمعته مش نضيفة وحد بوظ اللعبة أو نشاط، ولو تكرر الأمر مرة أخرى يبقى إحنا داخلين على كارثة، إنك بتعيد نفس النظام والأسماء القديمة الملوثة حتى لو مش موجودين بشكل رسمي.

وأضاف شوبير: الأسماء معروفة ولا داعي لذكرها، والناس اللي زي دول خلصوا وهاني أبو ريدة قالي خلاص الزمن توقف بالنسبة لهؤلاء الأشخاص.

وواصل: اللجان في الاتحاد كوم، ولجنة الحكام كوم تاني، وإلى أن تتسلم المسؤولية يوم 10 ديسمبر عليك مساندة لجنة الحكام الحالية أقوى مساندة، ولو شايفهم مناسبين وعايز تكمل بيهم تمام، لو عايز تجيب خبير أجنبي معاهم تمام، لكن لا بد من وجود لجنة قوية علشان الناس تصدق إن فيه شغل.

وشدد شوبير: إياك والاستعانة بالفاسدين، ودا معناه إن اتحاد الكرة هيخرب وأنت جاي تنقذ ما يمكن إنقاذه، لا بد من عمل لائحة كروية مش انتخابية، وكل واحد بيجي يعمل لائحة وعينه على الانتخابات الجاية علشان يفضل موجود هو رجاله مش عينه على التطوير وكلامي هنا على كل الاتحادات.

واختتم أحمد شوبير تصريحاته: أنا شخضيًا ينتابني القلق الشديد رغم تأكيدات هاني أبو ريدة ليا في أكثر من مكالمة، لكني شامم ريحة مش لطيفة وأنا من دلوقتي بحذر وبنبه وهكون راصد لفكرة إن حد مش كويس يكون موجود على رأس إدارة الكرة في مصر.